ក្តៅ! អាកាសយាន្តដ្ឋានថ្មី ៣ កន្លែងនឹងគ្រោងសាងសង់ក្នុងឆ្នាំ ២០១៨ នេះ

នៅក្នុង​ឆ្នាំ​២០១៨​នេះ រាជ​រដ្ឋាភិបាល​កម្ពុជា នឹង​អនុញ្ញាត​ឲ្យ​សាងសង់​អាកាស​យាន​ដ្ឋាន​អន្តរជាតិ​ថ្មី ចំនួន​៣ កន្លែង​បន្ថែម​ទៀត។ អាកាស​យានដ្ឋាន​ថ្មីទាំង​៣ កន្លែង​នោះ មាន​នៅក្នុង​ខេត្ត​សៀមរាប ខេត្ត​កណ្តាល និង​ខេត្ត​កោះកុង។ នេះបើ​តាម​លោក ម៉ៅ ហាវណ្ណាល់ រដ្ឋលេខាធិការ នៃ​រដ្ឋ​លេខាធិការដ្ឋាន​អាកាសចរ​ស៊ីវិល ក្នុង​សន្និបាត​បូក​សរុប​លទ្ធផល​ការងារ​អាកាសចរ​ស៊ីវិល ឆ្នាំ​២០១៣-២០១៧ និង​លើក​ទិសដៅ សម្រាប់​ឆ្នាំ២០១៨-២០២៣ ដែល​បាន​ធ្វើឡើង នៅ​សណ្ឋាគារ សុខា ភ្នំពេញ កាលពីព្រឹកថ្ងៃទី២៥ ខែមករា ឆ្នាំ២០១៨។

លោក ម៉ៅ ហាវណ្ណាល់ បាន​លើកឡើង​ថា អាកាស​យានដ្ឋាន​អន្តរជាតិ​ទាំង​៣​នេះ នឹង​ត្រូវ​សាងសង់​ឡើង​ស្រប​តាម​ស្តង់ដារ​អន្តរជាតិ។ ការ​អភិវឌ្ឍ​អាកាស​យានដ្ឋាន​អន្តរជាតិ​ថ្មី នៅខេត្ត​កណ្តាល ខេត្ត​សៀមរាប និង​នៅខេត្ត​កោះកុង ( តារា​សាគរ ) តាម​រយៈ​ការ​ចូលរួម​ភាព​ជាដៃគូ រវាង​រដ្ឋ និង​ឯកជន។

កាលពី​ខែ​ធ្នូ ឆ្នាំ​២០១៧ រាជ​រដ្ឋាភិបាល បាន​ប្រកាស​ពី​ការ​អនុញ្ញាត​ឲ្យ​ក្រុមហ៊ុន OCIC និង​អាកាសចរណ៍​ស៊ីវិល សហការ​សាងសង់​អាកាសយានដ្ឋាន​ថ្មី នៅខេត្ត​កណ្តាល ដែលជា​អាកាសយានដ្ឋាន​អន្តរជាតិ​លំដាប់​ថ្នាក់ 4Fគ្រោង​បោះទុន​វិនិយោគ​សរុប​ចំនួន ១៥០០ លានដុល្លារ។

ដោយឡែក ការ​អភិវឌ្ឍ​អាកាស​យានដ្ឋាន​អន្តរជាតិ​ថ្មី នៅខេត្ត​សៀមរាប និង​នៅ​ខេត្ត​កោះកុង (តារា​សាគរ) តាម​រយៈ​ការ​ចូលរួម​ភាព​ជាដៃគូ រវាង​រដ្ឋ និង​ឯកជន ( PPP )។ ដោយឡែក អាកាស​យានដ្ឋាន​ខេត្ត​កោះកុង ត្រូវបាន​រាជ​រដ្ឋាភិបាល បានផ្តល់​សម្បទាន​ឲ្យ​ក្រុមហ៊ុន​ឯកជន ធ្វើការ​វិនិយោគ ដើម្បី​បម្រើ​វិស័យ​ទេសចរណ៍​នៅ​តំបន់​អេកូទេសចរណ៍​នោះ។

រីឯ​អាកាស​យានដ្ឋាន​មណ្ឌល​គិរី អាកាស​យានដ្ឋាន​រតនគិរី អាកាសយានដ្ឋាន​ខេត្ត​ព្រះ​វិហារ និង​អាកាសយានដ្ឋាន​ក្រចេះ រាជ​រដ្ឋាភិបាល​បាន​ប្រគល់​ជូន​អាជ្ញាធរ​ខេត្ត ជាអ្នក​គ្រប់គ្រង​ក្នុងឆ្នាំ​២០១៦។

មកដល់​ដើមឆ្នាំ​២០១៨​នេះ កម្ពុជា​មាន​អាកាសយានដ្ឋាន​អន្តរជាតិ​៣ កំពុង​ដំណើរការ រួមមាន៖ អាកាសយានដ្ឋាន​អន្តរជាតិ​ភ្នំពេញ អាកាសយានដ្ឋាន​អន្តរជាតិ​សៀមរាប និង​អាកាសយានដ្ឋាន​អន្តរជាតិ ខេត្ត​ព្រះសីហនុ៕

ប្រភពអត្ថបទ​ @KLEYKLEY.SABAY.COM.KH​

Leave a Reply

Your email address will not be published.